Thursday, March 1, 2018

ഞങ്ങളുടെ ഒരു വർഷം. ഓൺലൈൻ വിപ്ലവത്തിന് ഒരാണ്ട്. പിറന്നാൾ മധുരത്തിൽ സൗത്ത് സോക്കേഴ്സ്...

ഇന്ത്യൻ - കേരള ഫുട്ബോൾ രംഗത്ത് വിപ്ലവകരമായ നീക്കത്തിലൂടെ ഉദയം ചെയ്തൊരു പ്രസ്ഥാനമാണ് സൗത്ത് സോക്കേഴ്സ്. സൗത്ത് സോക്കേഴ്സ് തങ്ങളുടെ  പ്രവർത്തന മേഖലയിൽ വിജയകരമായ ഒരാണ്ട് പൂർത്തിയാക്കുകയാണ്. ഒരു ഫുട്ബോൾ ടീമിനെ മാത്രം പിന്തുണക്കുക എന്നതിൽ നിന്നും മാറിചിന്തിച്ചുകൊണ്ട് ഇന്ത്യൻ -കേരള  ഫുട്ബാളിനെയും ടീമുകളെയും പിന്തുണക്കുക, തങ്ങളാൽ കഴിയുന്ന സഹായങ്ങൾ ചെയ്യുക, ഫുട്ബോൾ ലോകത്തിലെ വാർത്തകളും വിശേഷങ്ങളും  ഫുട്ബോൾ പ്രേമികളിലേക്കു എത്തിക്കുക... എന്നിങ്ങനെ നിരവധി ദൗത്യങ്ങൾ സൗത്ത് സോക്കേഴ്സ് ഏറ്റെടുത്തു നടത്തുന്നുണ്ട്..
വാട്സ്ആപ്പ് ഗ്രൂപ്പുകൾ :
തുടക്കം ഗൾഫിലെ പ്രവാസി മലയാളി ഫുട്ബോൾ പ്രേമികൾ മാത്രമുള്ള ഒരു വാട്സ്ആപ്പ് ഗ്രൂപ്പിൽ നിന്നായിരുന്നു. പിന്നീട് യൂറോപ്പ് വരെ പടർന്നു കിടക്കുന്ന ഇന്റർനാഷണൽ ഗ്രൂപ്പും കേരളത്തിൽ ഉള്ളവർ മാത്രമുള്ള കേരള ഗ്രൂപ്പും ഉണ്ട്. പ്രശസ്ത താരങ്ങളും പരിശീലകരും ഉൾപ്പെടുന്ന വെൽഫെയർ ഗ്രൂപ്പും സൗത്ത് സോക്കേഴ്‌സിനുണ്ട്. സൗത്ത് സോക്കേഴ്സിന്റെ നെടുന്തൂൺ 24 മണിക്കൂറും ആക്റ്റീവ് ആയ മീഡിയ വിംഗ് ആണ്. ഫുട്ബോൾ ലോകത്തിലെ വാർത്തകളും വിശേഷങ്ങളും ഫുട്ബോൾ പ്രേമികൾക്ക് എത്തിക്കാനായി നിസ്വാർത്ഥരായ പ്രവർത്തിക്കുന്ന ഒരു കൂട്ടം മെമ്പർമാരാണ് മീഡിയ വിങ്ങിന്റെ അടിത്തറ.എപ്പോഴും ചർച്ചകളും ആരോഗ്യപരമായ വാദപ്രതിവാദങ്ങളും കൊണ്ട് ആക്റ്റീവ് ആണ് സൗത്ത് സോക്കേഴ്സ് വാട്സപ്പ് ഗ്രൂപ്പുകൾ..  
ഫേസ് ബുക്ക്‌ പേജ് :
ഇന്ന് കേരളത്തിൽ മാത്രമല്ല ഇന്ത്യൻ ഫുട്ബോൾ ലോകം തന്നെ ശ്രദ്ധിക്കപ്പെടുന്ന ഒരു ഓൺലൈൻ മാധ്യമമാണ് സൗത്ത് സോക്കേഴ്സിന്റെ ഫേസ്ബുക്ക്‌ പേജ്. ഫുട്ബോൾ ലോകത്തിലെ വാർത്തകൾ, വിശേഷങ്ങൾ, തത്സമയ സംപ്രേഷണം എന്നിവ ഫുട്ബോൾ പ്രേമികൾക്ക് എത്തിക്കാൻ തങ്ങളുടെ ജോലിത്തിരക്കുകൾക്കിടയിലും സമയം കണ്ടെത്തുന്ന ഒരു കൂട്ടം യുവാക്കൾ ആണ് ഇതിനു പിന്നിൽ. കേരള പ്രീമിയർ ലീഗ്, ഇന്ത്യൻ ജൂനിയർ ടീമുകളുടെ ഗൾഫ് പര്യടനം തുടങ്ങിയവ ഇന്ത്യൻ ഫുട്ബോൾ ലോകത്ത് സൗത്ത് സോക്കേഴ്സിനെ പ്രശസ്തരാക്കിയ തത്സമയ സംപ്രേക്ഷണങ്ങളാണ്.മലയാളികളിൽ മാത്രമല്ല  ഉത്തരേന്ത്യക്കാരിലും  സൗത്ത് സോക്കേഴ്സ് പേജിനു ആരാധകരേറെയാണ്. 

സൗത്ത് സോക്കേഴ്സ് പ്രോഗ്രാമുകൾ :
ഗൾഫിൽ നടത്താറുള്ള സൗത്ത് സോക്കേഴ്സ് പ്രീമിയർ ലീഗ് പ്രവാസികളായ ഫുട്ബോൾ താരങ്ങൾക്ക്  തങ്ങളുടെ കഴിവുകൾ പുറത്തെടുക്കാനുള്ള ഒരു സുവർണാവസരമാണ്. ISL സീസണിൽ  ഗൾഫിൽ ലൈവ് സ്ക്രീനിംഗ് നടത്തിയും നാട്ടിൽ  ആഘോഷപരിപാടികൾ സംഘടിപ്പിച്ചും ഫുട്ബോൾ ഉത്സവത്തിന്റെ ഭാഗമായി. പരസ്പരം വാട്സ്ആപ്പ് മുഖേന മാത്രം പരിചയമുള്ള സൗത്ത് സോക്കേഴ്സ് കുടുംബങ്ങൾ തൃശ്ശൂരിൽ ഒത്തു ചേരുകയും എഫ് സി കേരള ക്ലബ്ബുമായി സഹകരിച്ചു കൊണ്ട് ഫുട്ബോൾ ഫീസ്റ്റ എന്ന പേരിൽ മുൻ ഇന്ത്യൻ പരിശീലകൻ നാരായണ മേനോൻ നയിച്ച ഫുട്ബോളിനെ കുറിച്ചുള്ള ക്ലാസും   സൗഹൃദ മത്സരവും സ്‌നേഹവിരുന്നും സംഘടിപ്പിച്ചിരുന്നു.
ഭാവി പരിപാടികൾ :
സൗത്ത് സോക്കറിന്റെ ലക്ഷ്യം എന്നത് തന്നെ ഇന്ത്യൻ - കേരള ഫുട്ബാളിന്റെ ഉന്നമനമാണ്. അതിനു വേണ്ടി പ്രവർത്തിക്കുകയാണ് സൗത്ത് സോക്കേഴ്സിന്റെ ലക്ഷ്യം. ചുരുങ്ങിയ ഈ ഒരാണ്ട് കാലത്തിനുള്ളിൽ ചെയ്യാൻ ശ്രമിച്ചത് പൂർവാധികം ഭംഗിയായി തുടരും. ഭാവി താരങ്ങളെ കണ്ടെത്തൽഅതിനു വേണ്ടി പ്രയത്നിക്കുന്നവരെ പിന്തുണക്കൽ , നിലവിൽ ഉള്ളതും പുതിയതായി വരുന്നതുമായ ടീമുകൾക്ക് പിന്തുണ നൽകൽ, സ്പോർട്സ് മേഖലയിലെ ഓൺലൈൻ മാധ്യമപ്രവർത്തനം, ഫുട്ബോൾ സംബന്ധമായ തിയറി - പ്രാക്ടിക്കൽ ക്ലാസുകൾ..... എല്ലാം ഞങ്ങൾക്ക് ലക്ഷ്യങ്ങളാണ്...

നന്ദി പറയാനുള്ളത് :
ഒരുപാടൊരുപാട് ഫുട്ബോൾ പ്രേമികൾ, ടീമുകൾ, പരിശീലകർ, താരങ്ങൾ... എണ്ണിയാൽ തീരില്ല.
ഒരു വർഷത്തെ പ്രവർത്തനത്തിൽ ഞങ്ങളെ പിന്തുണച്ച ഞങ്ങളുടെ സൗത്ത് സോക്കേഴ്സ് കുടുംബാംഗങ്ങൾ,ഐ എം വിജയൻ മുതൽ ഷഹബാസ് അഹമ്മദ്  വരെയുള്ള മലയാളികളായ ഇന്ത്യൻ താരങ്ങൾ, ഇയാൻ ഹ്യൂം, സഹൽ പോലെയുള്ള ബ്ലാസ്റ്റേഴ്‌സ് താരങ്ങൾ,ഉബൈദ്, രാഹുൽ പോലുള്ള മലയാളി ഐ ലീഗ് താരങ്ങൾ, നാരായണമേനോൻ സാറിനെ പോലെയുള്ള പ്രശസ്ത പരിശീലകർ, ഇന്ത്യൻ u16, 17, 19, 23, സീനിയർ ടീം & സ്റ്റാഫ്‌, എഫ് സി കേരള ടീം & സ്റ്റാഫ്‌, ഡൽഹി ഡയനാമോസ് ടീം & സ്റ്റാഫ്‌, പ്രമുഖ ഓൺലൈൻ സ്പോർട്സ് മാധ്യമങ്ങൾ, പത്രമാധ്യമ സുഹൃത്തുക്കൾ, മറ്റു അഭ്യുദയകാംക്ഷികൾ.... എല്ലാവർക്കും ഹൃദയം നിറഞ്ഞ നന്ദി... 
പരിഹസിച്ചവർ, പുച്ഛിച്ചു തള്ളിയവർ, വാട്സ്ആപ്പ് - ഫേസ്ബുക്ക്‌ മാധ്യമങ്ങളിലൂടെ പൊങ്കാലയിട്ട് സഹകരിച്ചവർ... ഞങ്ങൾക്ക് പോരാടി മുന്നേറാൻ ഊർജ്ജം തന്ന നിങ്ങൾക്കും നന്ദി.

1 comment:

  1. ❤️❤️❤️
    Media team 👏🏽👏🏽👏🏽👏🏽

    ReplyDelete

Blog Archive

Labels

Followers